ភ្នំពេញ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានសម្រេចដកមន្ត្រីជាន់ខ្ពស់នៃរដ្ឋលេខាធិការដ្ឋានអាកាសចរណ៍ស៊ីវិលមានឋានៈជាអគ្គនាយករង លោក បែល វ៉ាន់ដែត ចេញពីតំណែង និងបញ្ជាឲ្យរដ្ឋមន្ត្រីក្រសួងយុត្តិធម៌ធ្វើការជាមួយអ្នកតុលាការចាប់ជននេះដាក់គុក។
ការសម្រេចដកលោក បែល វ៉ាន់ដែត នេះធ្វើឡើងទាំងព្រលឹមថ្ងៃទី១១ ខែមេសា ឆ្នាំ២០២៣ នេះបន្ទាប់ពីសម្ដេចតេជោទទួលព័ត៌មានអំពីការប្រើប្រាស់អាវុធខុសច្បាប់របស់បុគ្គលនេះធ្វើបាបអ្នកទន់ខ្សោយ។
សម្ដេចតេជោបានសរសេរនៅលើតេឡេក្រាមរបស់សម្ដេចថា៖ «បើតុលាការមិនចាត់ការតាមផ្លូវច្បាប់ទេទុកឲ្យខ្ញុំដាក់វិន័យតាមផ្លូវរដ្ឋសិន។ អាងមានអំណាចប្រើប្រាស់អាវុធគំរាមអ្នកទន់ខ្សោយ»។
សម្ដេចតេជោក៏បញ្ចាទៅ រដ្ឋមន្ត្រីក្រសួងយុត្តិធម៌ធ្វើការជាមួយតុលាការសូមកុំឲ្យជនល្មើសនេះនៅក្រៅឃុំមុនពេលកាត់ទោស ដោយបារម្ភថាជននោះអាចតាមគំរាមកំហែងដល់អ្នកផ្សេងទៀត។
សម្ដេចតេជោចាត់ទុកថា នេះជាសារព្រមានចំពោះមន្ត្រីទាំងអស់សូមកុំអាងអំណាចធ្វើបាបអ្នកទន់ខ្សោយជាពិសេសសូមកុំប្រើប្រាស់អាវុធខុសច្បាប់។
ករណីលោក បែល វ៉ាន់ដែត បានកើតឡើងកាលពីថ្ងៃទី២៩ ខែមីនា ឆ្នាំ២០២៣ បន្ទាប់ពីមានរឿងរ៉ាវជម្លោះលើការប្រើប្រាស់ស៉ីផ្លេរមួយរវាងឡានរបស់លោកជាមួយនឹងឡានរបស់និស្សិតម្នាក់ រហូតលោកឈានដល់ថ្នាក់ជិះរថយន្តដេញតាមនិងភ្ជង់កាំភ្លើងគំរាមសម្លាប់ទៀតផង។
ទោះបីជាមានបណ្ដឹងនិងឡើងទៅដល់តុលាការក្ដី នៅថ្ងៃទី៣ ខែមេសា ឆ្នាំ២០២៣ តុលាការរាជធានីភ្នំពេញបានសម្រេចដោះលែងឈ្មោះ បែល វ៉ាន់ដែត ឲ្យមានសេរីភាព ដោយឲ្យស្ថិតក្រោមការត្រួតពិនិត្យតាមផ្លូវតុលាការតែប៉ុណ្ណោះ៕
